有調查就話禿頭先係男士嘅天敵，而且問題仲愈趨年輕化，近年呢項現象更入侵世界男子網壇，美國天王魯迪克、型男布萊克、俄羅斯球星迪維丹高，未夠30歲就開始頭髮稀疏，就連25歲的「泥地王」拿度近期都開始有這個問題，為何他們會「髮」生危機，難道真是與比賽太頻密有關？
講到男子網壇最有代表性的「光頭」球員，必數美國球星阿加斯，很多球迷都好懷念他當年長髮披肩的造型，不過，阿加斯這個冧爆球迷的不羈形象，原來是個假象，他在去年推出的個人自傳中親自篤爆這個隱瞞多年的秘密，他大概20歲時已開始脫髮，那一頭金髮其實是假髮，實在有點匪夷所思。阿加斯當時更因為怕自己的假髮會在比賽中甩掉，因而有巨大壓力，成績也隨之而降，後來正視問題，這位美國巨星最終選擇剃光頭，不但成績反彈重返世界第１，更贏得「德國玉女」嘉芙芳心，娶得美人歸。
當然阿加斯是網壇最經典的「光頭佬」，但同是美國型男的布萊克，未踏入30歲已加入光頭一族，剛剛31歲的俄羅斯名將迪維丹高所餘無幾嘅黃毛亦已成佢嘅標記，仲有官仔骨骨嘅魯迪克長年戴帽作賽，目的就係要掩飾佢愈嚟愈明顯嘅地中海。不過，最恐怖嘅是25歲的「泥地王」拿度都有這個問題出現，別看他頭髮長長，但從高角度望向頭頂，可清楚看到光禿禿的頭皮，試想想拿度變成「光頭佬」會是怎樣？
網壇猛男的禿頭現象愈來愈嚴重及年輕化，球迷「有目共睹」，哪點解會有這個問題？是傳染病嗎？德國波恩大學的教授馬庫斯的研究小組證實除咗係遺傳基因外，雄性激素的分泌異常也是導致脫髮的重要原因，簡單嚟講就係雄性激素分泌旺盛、腦力活動多的人，會容易禿頭，原因是腦活動多散熱亦多，人體自然就會靠脫髮來散熱。另中醫亦有「髮為血之餘，血汗同源」之說，運動員出汗多，加上精神壓力過大，亦會導致脫髮。
網球運動長期暴露於猛烈陽光中比賽，加上這項運動既產生熱量又需要腦力，還有運動員要頂着一個接一個比賽嘅壓力，球員甩頭髮比平常人多絕唔出奇。如果呢個情況繼續落去，咁下一個「光頭佬」又會係邊個呢？
撰文：李芷韻