隨着「PP」皮雅斯復出，塞爾特人昨日以100比92贏巫師，已盡洗開季3連敗頹風，近3場常規賽全部勝出。綠軍明早會在主場面對另一支問題多多嘅籃網，除「3巨頭」繼續坐鎮外，謝美奧尼爾小休後亦會復任正選，綠軍咁齊腳，大勝機會高。
（now 678周四早上8時30分直播）
雖然塞爾特人今季出閘脫腳，但皮雅斯復出後成班波即時唔同晒，昨日雖缺少中鋒謝美奧尼爾，幾名巨頭反而愈戰愈勇，結果輕鬆氣走巫師。
謝美奧尼爾賽後親證今場對籃網將會復出，意味綠軍可以「夫添」出戰。反觀客隊籃網早前有指主將迪倫威廉士因為不滿會方唔增兵而鬧情緒Hea打，搞到籃網近期慘遭5連敗，如此劣態實在難與綠軍抗衡，料成炮灰。