Annie G X JoJo女扮籃裝大激鬥
NBA終於都開鑼啦！除咗球迷高興之外，兩位now觀星台主播JoJo（陳瑋儀）及Annie G（吳燕安）都好興奮。唔講你唔知，原來兩位靚女對NBA相當熱愛，今次球愛敢死隊請咗兩位靚女傾吓NBA之餘，仲大騷哥利打番場友誼波。咪睇兩位主持人嬌滴滴，打起波上嚟都幾狠勁。好波雙姝專程為NBA開鑼日撐場，聖誕節梗係要乖乖地坐喺屋企睇波啦。
籃球運動多型仔，女仔對呢項運動亦較為受落。就好似JoJo咁，唔單止熱愛籃球運動，直頭係一個NBA迷。原來JoJo最鍾意就係効力熱火嘅勒邦占士。「大帝」好波唔在講，最重要係佢夠癲夠狂又夠喪。而佢以前就鍾意公牛嘅籃板王洛文，大家都知洛文係狂人，終日瘋瘋癲癲，行為又出位，去到邊都咁受人注意。一句講晒，JoJo最鍾意人夠喪，如果你自問係文質彬彬嗰批，咁就唔好意思，你唔係JoJo杯茶。不過，若然你對音樂有興趣，仲識拉小提琴的話，咁就開正JoJo嗰瓣。查實JoJo係動靜皆宜，鍾意打波仲識玩樂器，認真係多才多藝。
靚女主播睇得打得
至於Annie G，相信大家都好熟悉，唔少公開活動都見到呢個中國及西班牙混血兒。基於Annie G演出經驗豐富，本身又係模特兒出身，故此佢唔單止對攝影機有相當敏感度，亦好識得擺Pose。挺胸修腰踢腳樣樣齊，十八般武藝盡騷畀你睇。睇落Annie G天生食演藝呢行飯，擔任娛樂節目主持就啱晒佢。仲有，另一位觀星台主持Haily（陳俞希）原來同Annie G私交甚篤，兩個經常拍住上去的士高打碟，正式係有錢齊齊搵，唔好浪費青春本錢。係喎！據聞Annie G識得煮番兩味，中式西式都掂，下次再請佢上嚟露兩手先。
服裝提供：adidas