杜蘭特Young Gun捉魔獸
NBA開鑼日真係場場都咁精彩，雷霆主場對魔術，兩隊都如日方中弗到爆，雷霆雙星杜蘭特同埋韋斯布克已進身巨星行列，而魔術則成功留住「魔獸」杜域侯活，今仗激戰可期，不過睇番攤路，兩軍近兩季交手都係主場一方勝出，睇嚟雷霆有機會先勝一仗！
（now 635周一早上9時直播）
雷霆後生大把前途
雷霆上季殺入西岸決賽，表現惹人好感，吸收過上季嘅經驗，相信雷霆嘅戰鬥力會進一步提升，畢竟年輕就係雷霆最大本錢，除兩名孭飛球星杜蘭特同埋韋斯布克外，伊巴卡、占士夏登都係二十出頭，仲有好大進步空間，所以球隊嘅成績亦係一季好過一季。
魔術成功留住有離心嘅杜域侯活，但留得住個人，未必留得個佢個心，魔術嘅攻擊點始終冇雷霆咁多，冷面射手陶告魯又有傷上陣成疑，牌面難免被睇低一線，睇番對賽往績，近兩季四次交手，都係主場一方取勝，睇怕雷霆第一擊冇走雞！