高比紮住上難響頭炮

明早湖人大戰公牛,大家最關心都係湖人主將高比拜仁能否上陣,有消息指佢可能將手術押後,今仗帶傷紮住上陣,正所謂勉強冇幸福,作客嘅公牛有能力喺開鑼戰先拔頭籌!

(now 635周一早上6時直播)

高比仔嘅手腕韌帶撕裂,經檢查後證實傷勢頗為嚴重,但佢決定唔做手術住,因為如果依家做手術嘅話,預計要四個月時間養傷,由於今季球季縮短,高比仔依家做手術幾乎等於賽季報銷。

據《洛杉磯時報》報道,高比仔昨日已投入訓練,並且感覺良好,佢認為帶傷上陣影響唔大,最近甚至練習用左手射罰球及投籃:「我職業生涯面對過唔少傷患,相信今次同樣可以面對。」

咸美頓加盟 公牛升呢

不過,即使湖人有高比仔壓陣,形勢依然唔樂觀,因為奧當已轉投小牛,中鋒拜林又要停賽四場,令湖人戰鬥力大減。反觀公牛今季保留原班人馬,戴歷羅斯、布沙、諾亞等主將都在陣中,加上新加盟嘅咸美頓減輕咗羅斯仔嘅負擔,實力可謂更上一層樓,開鑼戰要贏波唔難!