贊特拿轉會打爆綠軍

今季NBA打頭陣嘅揭幕戰,係由兩支東岸勁旅紐約人同塞爾特人交鋒。「綠軍」今季以不變應萬變,保留三巨頭加納特、皮雅斯同埋雷阿倫在陣中,但主力年事已高,難以與全盛時期相比,今仗作客朝氣勃勃嘅紐約人,「綠軍」老兵有難!(無綫明珠台及now 635周一凌晨1時直播)

塞爾特人老兵有難

塞爾特人今季保留原班人馬,常規正選陣容相信係謝美奧尼爾、朗度、雷阿倫、皮雅斯同埋加納特,除朗度屬當打外,其餘各人高峰期已過,加上皮雅斯賽前有傷,今仗上陣機會只係五五波,外界對「綠軍」都唔係抱太大期望。

上季紐約人畀人攻強守弱嘅感覺,但今季羅致中鋒贊特拿後,陣容更加完整,呢位打法實而不華嘅中鋒,可專心喺內線做防守工作,等史杜迪米亞同埋安東尼可瘋狂搶分,唯一美中不足係控衞杜格拉斯略嫌卡士不足,未必可頂得住朗度嘅強攻,不過替補席上仲有經驗豐富嘅碧比喺度,相信紐約人整體戰鬥力仍然喺「綠軍」之上。