小牛係上季NBA總冠軍，故今場比賽開始前，球隊會在主場館內進行冠軍升旗儀式，但據《ESPN》透露，對手熱火決定唔畀面睇升旗，等儀式完晒先步出更衣室。
雖然熱火唔睇對手升旗被指小家，但由於佢哋正正係上季總決賽嘅輸家，所以亦有人體諒佢哋嘅做法，小牛「德國槍」魯域斯基賽前表示：「升旗儀式可能係我人生中最光榮嘅時刻，係球隊一齊努力得出嘅成果，我理解熱火球員選擇拒看，但若然我係佢哋就一定睇，因為可以激起鬥志去爭取勝利。」
不過，熱火始終都係今季奪標大熱門，《ESPN》在季前進行了賽季大預測，結果30名球評家中有25人都貼熱火捧得今季冠軍，另外3人捧公牛，2人捧雷霆，反而上季冠軍小牛一票都冇，完全被人睇死。