年多前波總一度陷入財困，職員出糧都有困難，要靠東亞盃獎金同日本隊來港踢亞洲盃嘅轉播費接濟，諗起都心酸，不過以後波總可以挺起胸膛做人喇！事關「鳳凰計劃」展開後，政府未來三年每年預留二千萬畀波總，就好似窮光蛋中正金多寶咁，苦盡甘來。
據官方說法，波總大部分支出係用於招聘管理專才，例如已經上任嘅ＣＥＯ麥國棟，年薪估計有七位數，而即將上任嘅港隊教頭、市務同財務總監等專才，統統搵獵頭公司全球性招聘，人工當然非常乸脷。
用咁貴人工喺外國請人返嚟管理本地波，係咪真係有用就要下回分解，但係使政府錢，事事講求程序，樣樣要執到正，試想吓，香港遍地人才，麥國棟呢類行政管理高層，喺中環隨時搵到一大籮，但如果波總唔按正常程序招聘，改為自行去中環物色，或者索性搵相熟老友出任，人工可能冇咁貴，不過就好難過到政府嗰關。
「鳳凰計劃」成效係點仲要慢慢觀察，但波總率先斬斷窮根，唔使再驚冇糧出，已經係一個好開始，希望稍後可以惠及球會同球員，球圈先至有好日子過。
波男