今季和富大埔、屯門、公民都推出季票優惠，大埔係二百蚊全季任睇，屯門就二百五十蚊全季任睇兼送T恤，至於公民亦係二百五十蚊，包埋亞協盃賽事，據講晨曦球迷會都有類似優惠，有關詳情就等佢哋正式公布。
深水埗首戰賣大包收廿蚊
根據各球會優惠嚟睇，以本地波正價飛六十蚊計算，每票折讓一半以上，平均廿零蚊睇一場比賽，其實即係減咗價。
新升班嘅深水埗更加直接，索性大幅減價，嚟緊星期六第一場聯賽深水埗主場對公民，撞正同日有南華對屯門喺大球場舉行，深水埗就賣大包一律收廿蚊，由於深水埗運動場座位只有二千左右，廿蚊門票再加贈券，預計佢哋首場甲組聯賽嘅場面會有一番熱鬧。
波男