籃球超聯平飛睇貴星

布福特勁加薪30%

衞冕的福建領隊黃偉鴻透露今年外援薪酬升幅強勁，單是邀請上屆ＭＶＰ布福特重來，人工就要勁加30%；他更直言如贏冠軍雖可獲賽會獎金6萬元，但這數目連布福特一場波的薪酬也不夠支付。不過，賽事門票只係收30至80元不等，球迷買飛入場，簡直超值。

黃偉鴻補充：「布福特上年贏得ＭＶＰ，所以知道自己的價值變高了，相對地便提高薪酬要求，大約加了30%左右。由於其薪酬是逐場計算，而且肯定超過六位數字。雖然贏冠軍所得獎金連他一場波的波糧也畀不起，但我們辦球隊志不在賺錢，反而能夠打一場好波給觀眾看才是重要。」

周二晚修頓開打

對於賽事有外援參戰，上屆獲得3分王榮譽、飛鷹後衞梁民熊直言更有挑戰性：「雖然實力上有距離，但如果像去年般自己以華人身份獲得個人獎項，將特別有意義。」經抽籤後，周二修頓揭幕戰為飛鷹鬥南華，尾場則為上屆決賽翻版，由福建迎戰永倫。

金至尊盃超級聯賽

日期 時間 賽事

19/7（周二） 7:00pm 飛鷹Vs南華 8:40pm 永倫Vs福建

20/7（周三） 7:00pm 南華Vs永倫 8:40pm 福建Vs飛鷹

21/7（周四） 7:00pm 飛鷹Vs永倫 8:40pm 南華Vs福建

23/7（周六） 12:30pm 季軍戰 2:45pm 冠軍戰

地點：灣仔修頓室內場

首3日初賽門票為$50、學生及長者$30，並在周一上午10時起預售，每人最多可購每個比賽日3張門票。

決賽入場券$80、學生及長者$50，門票於當日上午10時起公開發售。