根據內地傳媒報道，繼地產商恒大加入球圈組成廣州恒大之後，另一地產商富力集團日前亦宣布接管面臨解散嘅中甲球會深圳鳳凰。波男聽啲大陸商界朋友講，呢支大水喉唔係講笑，深圳鳳凰不但唔使解散，今季仲有機會升班添！
香港人成日將「地產霸權」掛喺口邊，事實上搞地產真係好發，再用地產賺番嚟嘅錢搞波就掂晒喇，好似阿仙奴就有個最佳示範，佢哋將舊主場高貝利球場地皮起豪宅，09至10年度房地產收入就有二十億港元，令到兵工廠大把水擴軍。
講番富力收購鳳凰單嘢，據聞佢哋一出手就用一千四百六十萬人仔買起成隊波，該筆款項係幫球會還清債務，亦畀欠薪欠獎金已久嘅職球員出糧，一切問題解決晒，球隊現時戰意如虹，力爭升班。
若然他日富力升班，連埋廣州恒大，將來廣東省就有兩支中超球隊。聽講富力總裁張力本身都係球迷，對幾年前嘅中國足球更有一定了解，佢話有一次去睇中國大戰南韓，未開波已經有人話佢聽中國輸幾多球，當晚仲見到球員喺賭場出入，自此佢亦絕迹球場。不過近兩年足協掃賭打黑，球圈回復正常秩序，令佢雄心再現加入球圈。
再睇現時內地聯賽，河南建業、杭州綠城、山東魯能、長春亞泰等球隊都係由地產商入主，加上恒大同富力，中國聯賽好多球隊都係由各地產商支持，地產足球成風，呢股風氣若然吹落嚟香港，本地波就有救囉。
波男