高球手太太個個高質素！高爾夫球手是世界最賺錢的運動富戶，據《福布斯》統計，冠絕全球的體壇巨星王位多年來由「老虎」活士雄踞，可以說，這圈子內千萬富翁比比皆是，而他們的另一半多是名模、選美王后之類的高質美女，成為球場另一道風景。最近多位高球夫人推出WAG（Wives and girlfriends）真人Show節目，大班靚太女友索爆登場，將球手私生活大公開。
真人Show發起人主要係三位靚太，出力最多就係艾斯特斯（Bob Estes）嘅賢妻莉姿（Liz），其實莉姿本來係流行音樂歌手，今次開拍真人Show，希望有製片人對佢哋一班靚太感興趣。
莉姿三年前下嫁艾斯特斯，佢話丈夫係一個極度保守嘅人，同佢嘅性格完全相反，不過今次公開生活片段，老公不但唔阻止，仲批准佢可以穿着挑逗性嘅服裝出鏡做節目，真係皇恩浩蕩。
講到跟住老公比賽，莉姿完全係一個驚慌小婦人：「初時我只係留喺車上，唔敢走入會所同用餐區，因為每個人都自成一角，我好難參與。」
梅莉莎（Melissa Weber）選美出身，佢係2009年美國愛達荷州小姐冠軍，今次開拍真人Show，梅莉莎亦成為最矚目嘅Golf Babe，更成為今次洛杉磯市場推廣公司Reverb Collective嘅力捧對象。
雖然佢老公馬特鍾斯（Matt Jones）喺美巡賽成績一般，但高球粉絲對呢位跟得夫人梅莉莎更有興趣，因為大家都好奇想知，選美冠軍變成高球手夫人嘅少奶奶生活有幾精彩。例如梅莉莎教大家點樣睇高爾夫球、做美容護膚、揮霍金錢同籌募善款。當然，最引人注目嘅始終係佢弗到爆嘅身材同靚樣。
高球手維爾‧麥肯齊（Will Mackenzie）嘅太太阿莉（Alli Mackenzie）係模特兒出身，曾在《男人裝》雜誌出現，佢對於影相同拍片比較熟行，並自設底線：「我哋會好小心，唔會做出冒犯任何人嘅事情。我有一大堆《體育畫報》泳裝專輯，睇過好多運動員及太太們嘅照片，我哋輯寫真嘅挑逗性不能越軌，只係滿足一下大家要求。」
阿莉亦好明白大眾對呢班WAG嘅八卦心態，佢話：「以前我跟住老公參賽，好多人會問我識唔識活士同米基遜，依家就唔同晒，啲人會問我識唔識活士個老婆，同埋有乜內幕消息。」