兩年一度嘅歐洲女子籃球國家盃今屆於波蘭舉行，經過兩輪分組賽後已誕生八強，今晚先進行兩場八強淘汰賽，兩階段分組賽均以首名出線嘅捷克被視為今屆熱門之一，八強鬥克羅地亞相信可輕鬆晉級。
目前歐洲女子籃球國家盃大熱係黑山，佢哋係唯一八戰全勝球隊，但捷克所處組別對手較強，故八戰七勝一負成績亦唔錯。捷克陣中兩名主力貝高娃及助攻王保迪露娃都發揮水準，喺封阻榜及助攻榜打入前五位。
反觀克羅地亞成績麻麻，太依賴得分王文迪亞攞分，戰術容易被對手洞悉，兩階段分組賽都係以最尾名次出線，上仗反勝西班牙有啲運仔，今場唔會再咁好彩o架喇！