譚兆偉頓悟人生

今年9月將滿41歲嘅譚兆偉,其足球生涯威水史已詳列在維基百科,不過近年令人記得佢嘅都係負面新聞,例如早年嘅「雙氧水」,臨近退役之時爆出「豪賭欠債」及「仰藥自殺」,令「譚兆偉」3個字登上港聞頭條,震撼球圈,依家偉仔已經重生,仲同大家分享佢對生命同足球嘅睇法。

死過翻生學懂珍惜

「喺我20年足球生涯入面,冠軍呀、足球先生呀,所有目標都達成晒,我再冇遺憾啦!」「偉仔」在08/09球季出任甲組隊四海教練,但球季未完已離職。1個月後他便因欠下賭債,服食過量安眠藥自殺。「債務問題依家有好多朋友仲幫緊我,邊個就唔好講喇,但已經安排好點還,OK啦!」

「當時(指自殺)只係一時睇唔開,之後已經放低咗,重新再嚟過,依家係一個新挑戰。我高峰時月入5、6萬,依家教波搵嘅錢當然冇咁高啦,但生活方面冇問題,有時見到小朋友進步,都好有滿足感。」

既然死過翻生,想必有所領悟。一提起已離世嘅恩師黎新祥及後輩蔣世豪,他就忍不住淚盈於睫:「黎Sir過身係因為有病,冇得好講,我只希望將黎Sir以前教過我嘅嘢,全部教番畀小朋友,尤其係紀律。」講到「豪豬」:「我本身同佢唔太熟,喺佢退休後,大家踢多咗小型球先多咗接觸,佢嘅死……好似自己都係過來人咁,提醒我以後要珍惜生命,凡事要向好嗰方面諗。」

教波繼承黎Sir遺志

自去年開始,「偉仔」決心要繼承「黎Sir」遺志,任職阿仙奴足球學校教練,升任為「譚Sir」,主力教小朋友踢波,他說:「呢9個月,星期一、五教成人班、星期二教丙組地區、星期三、六就阿仙奴足球學校、星期日又有丙組比賽。球季完咗,逢二、四可以放吓假。」

現時生活十分充實嘅「偉仔」,有空閒便會爭取時間陪家人,例如這天便帶埋媽媽到長洲,開完工後,兩母子便在離島晚餐共享天倫。

偉仔小檔案

出生日期:1970年9月17日(40歲)

暱稱:偉仔

曾効力球會:東方、流浪、快譯通、晨曦、傑志、四海、愉園(乙組)

位置:進攻中場

個人榮譽:94/95香港足球先生、92至95香港足球明星

圖/文:Vincent