呢排講開WNBA，原來好多籃球迷都好興奮，因為佢哋睇完NBA之後好失落，要搵WNBA止一止癮，香港時間周三凌晨零時有場直播波，由亞特蘭大夢想主場對芝加哥天空，難得足球賽事咁靜局，不妨轉吓口味睇籃球。 （now 678及有線165台周三凌晨零時直播）
芝加哥天空今季表現唔錯，三勝二負排東岸第二，由於東岸競爭冇西岸咁激烈，天空只要保持水準嘅話，相信去到季後賽都有能力同其他對手爭一日之長短。天空季初表現最好球員係中鋒科妮絲，佢平均每場攞到21.2分及8.8個籃板，今場對住夢想嘅巴西中鋒艾卡迪蘇莎，應可佔到甜頭。
亞特蘭大夢想可謂WNBA陪跑分子，打咗六場僅贏一場，上仗對明尼蘇達天貓僅攞得64分，攻擊能力相當弱，加上近九次對天空輸咗七次，睇怕今場都好難打破宿命！