運動博彩業發展一日千里，環球博彩公司開盤賽事種類繁多，除咗世界各地頂級及次級足球聯賽外，其他熱門賽事包括NBA、網球及高爾夫球等項目都有得玩。《環球衞星》將會帶嚟世界最IN最潮博彩資訊，令大家可以掌握更多情報，緊貼市場脈搏，比別人睇得更多、更闊！
閒話休提，頭炮同大家睇吓即將開打嘅溫布頓網球賽女子單打項目情報，俄羅斯選手舒拉寶娃被唔少莊家捧成冠軍大熱，著名博彩公司威廉希爾及Paddy Power同樣開出4.5倍。「寶娃」屬女網人氣選手，所以慣性獲散客捧場，賠率往往偏熱。不過，佢早前曾於法網四強不敵李娜，演出唔算特別好。
至於美國球星S威廉絲則被視為次熱門，賠率介乎4至6倍，現時來勢洶洶，陸續出現跌飛情況，bet365更將佢捧成大熱，只得4.5倍。「細威」被編為溫網八號種子，將會全力爭取衞冕，不過，佢因病休戰多時，雖然啱啱復出贏波，但過程相當辛苦，反映其狀態未谷起，今次被捧成熱門，難免令人有戒心。
中國一姐李娜今屆被編為四號種子，佢剛於法網稱后，但由於名氣唔及其他對手，所以分頭唔差，現時被大部分莊家視為第三熱門，賠率介乎7至9倍。「娜姐」大熟大勇，難得再有大樹遮蔭，隨時又爆多鋪。