魯域斯基除了希望在今季一圓冠軍夢之外，原來佢仲打算喺季後同女友謝茜嘉奧臣拉埋天窗，實行「雙喜臨門」。不過小牛為免傳媒廣泛報道而影響「德國槍」情緒，立即代表佢向外界澄清，指傳聞只屬「煲水」。
由於有美國媒體爆料，指魯域斯基已經同女友謝茜嘉奧臣訂婚，並會在球季結束後拉埋天窗，因而令小牛大為震怒。事關在09年季後賽時，魯域斯基就因為前女友「千面女飛賊」泰萊被ＦＢＩ通緝，而搞到情緒大受影響，小牛最終更在次圈遭到金塊淘汰，球會當然唔想「德國槍」又為情所困。但據悉「德國槍」非常深愛有啲家底嘅謝茜嘉奧臣，早已視佢為終生伴侶，加上之前被泰萊傷得太深，所以好想盡快組織家庭，重新開始。
另外，魯域斯基於Game1左手指受傷，將於往後賽事戴上指套比賽，但佢屬右手將，應無大礙。
另外，因傷缺席大半季賽事嘅小牛前鋒卡朗畢拿，早前已經傷愈，佢仲透露每日積極操練，希望重拾狀態幫球隊爭冠。基於熱火嘅夏士林今季都係養傷多時，但季後賽一樣能夠幫到球隊，所以有指小牛教練卡素爾，將會在考慮派卡朗畢拿在總決賽復出。