「三弟」保殊猛火屠牛
正所謂邊度跌低，就喺邊度起番身！常規賽面對公牛曾經寫下18投1中恥辱性數據嘅「龍王」保殊，尋日終於在公牛面前挽回聲譽，轟入個人熱火季後賽生涯新高34分重現霸氣，協助熱火以96比85擊敗公牛，總場數領先至2比1。
對保殊嚟講，今季最難忘嘅賽事肯定非二月作客公牛莫屬，皆因保殊當時被公牛內線拍檔布沙及諾亞守到一戙都冇，18次起手僅中1球，命中率不足6%，被球迷笑到面黃，更被揶揄為三巨頭中的「三弟」，有破壞冇建設。幸好佢知恥近乎勇，尋日再戰公牛打出今季代表作，同樣起手18次，但今次入了13球，命中率高達七成以上，全場共取得34分，係佢季後賽生涯第二高得分，最高分一次則為08年効力速龍時取得的39分。
保殊賽後獲得隊友大讚，勒邦占士表示：「球隊在今場改變了進攻策略，以保殊為重心，不斷為佢傳送，結果佢冇令我哋失望。」
戴歷羅斯繼續冇貨賣
除保殊之外，今場主要做策劃嘅「大帝」亦表現得極具級數，全場攻入22分及交出10次助攻，還有2次搶截及2記封阻，防守同樣出色。不過最抵讚係佢今場上陣達到44分鐘之多，但竟能保持零失誤，可見「大帝」在季後賽打得愈來愈集中。反觀公牛領袖戴歷羅斯在今圈發揮持續欠佳，今場受制於韋迪針對性防守下，19次起手僅中8球，僅交出20分。
本報綜合報道