鳳凰城太陽總裁維特斯早前公開了自己係同性戀者，令輿論嘩然，而曾經効力過鳳凰城，近年已轉做「講波佬」嘅巴克利，就透露自己亦曾與同性戀者做隊友，仲話好「享受」添！
一向言論大膽嘅巴克利指出，自己仍在NBA打滾嘅時候，至少在兩至三支球隊碰過同性戀隊友，不過佢就一啲都唔抗拒，因為佢只會關心隊友嘅能力，只要球員係有料，任何性取向都冇所謂，仲話好樂意同佢哋做Friend添。至於在更衣室會否出現尷尬場面，巴克利就話自己未撞過，因為同性戀者好少會表露「同志」身份。
另外，巴克利亦趁機呼籲外界唔好對同性戀者戴上有色眼鏡，並大讚維特斯「出櫃」（即公開同性戀者身份）勇敢，仲話好支持同性戀婚姻。