東岸決賽次回合公牛主場對熱火，將於香港時間周四早上舉行，於季後賽發揮一般嘅公牛大前鋒布沙，公開感激隊友支持，令佢可渡過難關，喺贏鷹隊嘅最後一仗復甦，佢仲話熱火係勒邦占士同韋迪嘅二人球隊，擺明唔放熱火中鋒保殊在眼內！
布沙表示：「季後賽初段我確實發揮得唔係太好，但我哋就好似一家人咁，好多隊友不斷對我鼓勵，就係呢個原因，我先可以喺對鷹隊嘅第六回合大爆發！我知道熱火係奪標熱門，佢哋有兩位偉大球星勒邦占士同韋迪，但我哋冇心理壓力，呢點對我哋爭取出線更有利。」
戴歷羅斯亦對布沙充滿信心：「佢已經衝破心理障礙，只要發揮水準，公牛嘅威力會倍增。公牛係一支團結嘅球隊，我哋要用所有人嘅力量擊敗熱火。」
勒邦占士則表示嚟到最後關頭，防守係勝負嘅關鍵：「我相信東岸決賽唔會出現太高得分比賽，邊個犯錯少，防守出色就可贏得冠軍，雖然我同戴歷羅斯嘅位置唔同，但必要時我會親自防守佢。」
本報綜合報道
