陳念慈：強制着裙令過火！
前香港羽毛球名將Amy陳念慈，對於「着裙令」認為有點「過火」，並坦言國際羽聯強行推出這個新制，欠缺自己風格，要增加觀眾收視應從球員方向考慮。
Amy在70、80年代都有試過穿裙比賽，她認為若要從運動上加添Fashion元素，球衣設計相當重要：「好似我哋以前打全英賽，大會都要求白衫、白褲、白裙、白鞋嘅全白系列，但依家已經變晒，我覺得最重要係設計好，好似過往女仔嘅波褲以男裝設計為基本，所以着得唔舒服，依家裙裝都係一樣，設計好嘅話，球員就可以舒服地比賽。」
Amy坦言可理解國際羽聯的想法，但不太認同強制性實行：「當然女孩子着靚啲係好事，但強制性變咗令球員冇自己風格，其實好多球員都有觀眾緣，球員嘅氣質好重要，我相信球迷鍾意睇佢哋打好波，多過睇佢哋着咩衫囉！」