湖人畀蜂王玩殘 高比仔撐拐杖收場！
「小飛俠」飛唔起，仲搞到撐拐杖收場！衞冕總冠軍嘅湖人昨日畀「蜂王」基斯保羅玩殘，作客以88比93輸波，畀黃蜂追至總比數2比2，更有王牌「小飛俠」高比拜仁罕有地半場捧蛋，完場時更因腳傷要撐拐杖上隊巴，幸驗傷後有驚無險，高比仔自己話可以喺明晨主場對黃蜂嘅Game5上陣。
高比拜仁昨仗上半場7射全炒，近7年來首次錄得半場捧蛋嘅羞家紀錄，雖然「小飛俠」全場仍貢獻17分、6個籃板及8次助攻，並累積971次助攻及1,214個罰球，超越名宿謝利韋斯嘅季後賽助攻次數及罰球命中數目，然而，全場貢獻27分、13個籃板及15次助攻嘅基斯保羅至係全場焦點，成為黃蜂主場砌低湖人嘅最大功臣。
半場捧蛋幸傷勢無大礙
比賽中途傷腳嘅高比拜仁，要撐住拐杖入更衣室同上隊巴，但佢向球迷大派定心丸，揚言明晨返主場打嘅Game5，定會落場。
另外，76人尋日爆冷砌低熱火，追至總比數1比3吊住命，至於魔術就以3分之差不敵鷹隊，總比數落後到1比3。
戰果放送
76人 86:82 熱火
紐約人 89:101 塞爾特人
鷹隊 88:85 魔術
黃蜂 93:88 湖人
註：前者主場