新一季中超聯賽月初開幕，廣州恒大好大手筆，早前請咗好多香港球圈人士去廣州睇開幕典禮，波男都係獲邀一分子，恒大又真係幾有辦法，直情當正亞運開幕式咁搞，千人操加載歌載舞，搞咁大壇嘢目的好明顯，就係向外宣示佢哋好重視足球！
港足依家搞緊「鳳凰計劃」，十畫都未有一撇，但係中超呢隻鳳凰已經慢慢翻生！其實早兩年嘅「掃黑打假」行動，就係中超版嘅「鳳凰計劃」，經過兩年淨化，球圈環境相對乾淨咗，各隊都肯加大力度組軍，花巨款邀請高質外援加盟，聯賽水平自然有提升機會。
開幕當晚，有好多香港球圈人士喺度，包括波總高層，亦有幾個贊助商，見到中超開幕搞得唔錯，又有人舊事重提：「港隊幾時北上打中超？」坊間有個講法，就係當「鳳凰計劃」上軌道之後，就係香港隊北上打中超之時。
記得兩、三年前波總主席「拜仁梁」講過，要組織一支似樣嘅港隊打中超，每年班費要五千萬。不過依家睇嚟，呢個價錢已經唔得，因為「掃黑打假」後，整個中超已經升值，現時中超前列球隊嘅班費平均係八千萬至一億元人民幣。
情況就等如香港市民想用番「沙士價」買樓，已經冇可能，依家中超開始上軌道，發展起飛，香港足運仲徘徊喺用邊個改革方案，港隊嘅中超夢睇怕都好難成真。