日本退出美洲國家盃後，西班牙足總會長略納自爆獲阿根廷邀請參賽，佢亦有興趣派隊，世界盃冠軍參戰美洲國家盃，的確非常有噱頭，若然順利成事，肯定可令賽事矚目程度大大提升，但到底係咪順利傾得掂呢？
作為今屆美洲國家盃搞手，阿根廷足總會長格隆當拿當然唔衰得，日本放棄參賽後，佢即時秘密接洽西班牙足總會長略納，落足嘴頭成功氹到對方落疊，略納公開向西班牙傳媒表明想安排球隊參戰美洲國家盃，佢仲冠冕堂皇話要回饋南美國家多年來向西班牙球會輸出無數巨星，聽落似乎一拍即合喎。
不過，計劃仍然面對重重難題，淨係兩大豪門巴塞同皇馬嗰兩關已經相當難過，自○八年歐國盃後，西班牙國腳年年夏天都冇時停，兩間大會已經詐晒型，而且踢太公波球會冇錢分，佢哋點會咁順攤放人吖。再者，西甲球會近排同政府因為電視免費直播規定炒大鑊，依家足總又辣多個火頭，恐怕只會燒死自己。
站在球迷角度，梗係想睇到西班牙同巴西及阿根廷等南美勁旅喺美洲國家盃交手。不過，波男希望西班牙足總唔好下巴輕輕應承人哋，跟住整隊山寨版西班牙B隊敷衍了事，畀人喪噓嗌回水事小，最怕整臭國家隊個金漆招牌咋！
波男