勒邦占士以往係騎士皇帝，帶朋友自出自入都冇人過問，但今時唔同往日，「大帝」喺返克利夫蘭對騎士賽前，同朋友駕車到母會操練時，其友人就被禁止入場，而占士亦冇權在騎士場館內泊車，騎士班主基拔更叫占士滾出停車場！
在美國時間周二早上，占士與友人一同駕車到騎士場館作投籃操練，但入場時就有多少阻滯，首先騎士只容許占士一個入場，還要作安全檢查，另外車輛都不能泊在場館停車場。騎士發言人表示，客隊想獲得車位嘅話，必須在賽前申請，以前占士係騎士球員，才可以自出自入。
已視占士為世仇嘅騎士班主基拔，得悉事件後即在Twitter上留言，叫占士滾出球隊停車場！不過「大帝」今次就未有動怒，賽後再一次表示會對母會送上祝福，似乎經過「報應論」之後，「大帝」已經學精咗，以免又試禍從口出。