ＮＢＡ常規賽已進入尾聲，球迷最關心嘅應該係邊隊能夠搭上尾班車，參戰今季季後賽。西岸第八位應該係灰熊同火箭之爭，雖然火箭現時仍落後2.5場勝仗，但阿裕就睇好佢哋會成為「最幸運嘅乘客」，踢走灰熊搭到尾班車。
火箭近期走勢不俗，近六場常規賽贏出五場，只係輸過畀坐擁「超級三巨頭」嘅熱火，總成績已逐步追貼灰熊。火箭成績提升，個人認為係放走老將柏堤亞之後，球隊進攻速度提升，更加適合呢支年輕具活力嘅球隊，再者，控球後衞路維擔大旗後愈見成熟，明顯較布魯克斯更適合擔任指揮官，阿裕愈來愈喜歡呢個班底。
至於灰熊，最蝕章當然係領袖基爾已決定做手術提早收咧。老實講，灰熊嘅東尼阿倫同森楊格都係非穩定嘅得分球員，隊內根本冇人可以代替基爾嘅位置，阿裕認為灰熊自斷半臂後，會因此錯失埋季後賽資格！