由於個別甲組會反對，香港隊每周一課嘅長期集訓已經叫停，唔想練波嘅大港腳毋須再「應酬」波總而去球場齋睇唔練，最弊嘅係壞影響已經出現，仍在集訓中嘅奧運隊同年齡更細嘅U21，個別球員態度鬆散，球隊紀律敗壞必須糾正。
鍾意睇本地波嘅港人雖然唔多，但代表隊事務，其實仲有好多球迷關注同留意，過去大半年，波總希望提升港隊實力，宣布每周操練一課，國際熱身賽檔期安排出戰外隊，可惜此計劃受到個別甲組會阻攔，上月友賽馬來西亞後更遭叫停，今個星期雖然係國際熱身賽檔期，但波總並無安排友賽。
正所謂唔好大教壞細，個別大港腳唔重視代表隊，不但嚴重影響足運形象，更禍延下一代，奧運同U21兩支梯隊都需要集訓同比賽提升實力，但個別球員嘅態度卻係愛理不理，有部分球員竟然唔知自己入選，完全唔當代表香港有乜特別。
見到呢個現象，有教練私下同波男呻，依家啲球員態度太差，難怪港隊呢十幾年水平跌得咁犀利，佢話上幾代嘅球員無論跟邊個班主，都以代表港隊為榮，點會搞到依家咁，代表隊變做冇掩雞籠！