改革本地波嘅「鳳凰計劃」，仲有兩個星期多啲就會投票表決，其實呢件事可以用三個字講完，就係「分餅仔」！波總依家要做嘅，就係要令到四分三屬會同意呢個計劃，到時投贊成票通過。
據波總披露，鳳凰計劃若然實行，波總每年將會獲得政府注資四千萬元作為營運經費，徹底解決一直困擾波總嘅財赤問題，至於呢四千萬咁大舊錢點樣使，則未有披露。
以最簡單嘅計算去睇呢件事，波總現時有五十三個屬會，若然將政府注資嗰四千萬就咁分咗佢，每間屬會所得大約係七十五萬。
七十五萬若然用喺一支甲組中型班，大約只夠出三、四個月糧，第五個月就冇糧出，用喺乙、丙組球會，其實亦只係夠出一年車馬費同飲飲食食，使晒就冇。即係話若然就咁分錢，對推動足運不但全無幫助，簡直係浪費公帑。
其實除咗呢四千萬，改革報告中仲有好多餅仔要重新分配，政府亦唔容許波總亂使錢，就好似政府早前宣布向市民派六千蚊，公布當日人人都好開心，但係冷靜過後好多人都認為，派錢唔係好方法，對解決長遠問題並無幫助。
本地足運將來要行邊條路，佔大多數選票嘅乙、丙組取態相當關鍵，但係究竟點先可以令乙、丙組喺改革中得益，波總真係要戙高床板諗清楚。
波男