祖高域開季18連勝！

決賽首次擊敗一哥

如果計埋去年尾嘅台維斯盃決賽，祖高域嘅連勝紀錄增至20場，今次擊敗拿度更加意義非凡，因為在此之前兩人23次交鋒，祖高域僅得7勝，其中5次喺決賽對壘全敗，包括去年美國公開賽決賽飲恨於拿度拍下，今次終於喺決賽擊敗拿度，可以話打破埋心理陰影，嚟緊各項賽事，祖高域面對任何對手都無所畏懼。

祖高域賽後對拿度仍給予極高評價：「雖然今場我贏咗，但你仍然係一位偉大嘅冠軍球手，每次同你交手都係我嘅榮幸。」拿度亦祝賀祖高域今季繼續有好發揮。祖高域雖然已成功超越瑞士天王費達拿，進佔世界排名第2，不過由於拿度亦殺入決賽，呢位西班牙戰神嘅積分仍領先祖高域，一哥地位暫時非常穩陣。

一姐奪標 李娜升第6

另外「世界一姐」禾絲妮雅琪亦以盤數2比1擊敗法國球手芭杜莉，順利登上印第安韋爾斯女單后座，係佢職業生涯第14個錦標及今年第2個錦標，贏波後「丹麥甜心」繼續喺女單世界排名第1。

至於中國金花李娜排名微升1級進佔第6，亦刷新個人及中國金花嘅最高排名。