今季升班嘅港會同屯門，前者堅持以業餘班參賽，而屯門其實亦只算半職業，經過大半季比賽，港會歷史性殺入聯賽盃四強，屯門亦企穩甲組中游，贏過傑志、和過南華，究竟係港甲職業波業餘化，還是業餘波職業化？
其實本地波職業同業餘嘅界線一直好模糊，有質素有條件嘅球員實際只得一條出路，就係「跟住老細走」，無論點樣標榜職業化，呢個情況喺本地波都冇改變過，所以我哋成日講「老細足球」就係咁解。
講到符合亞洲足協對職業球隊嘅要求，論設施人才管理，全香港反而只得港會達標！可惜佢哋堅持唔搞職業，至於其餘九隊，仍然要面對「走鬼式操練」嘅現實，即使係擁有英超級球星嘅南華，練波過鐘一樣要畀管場地嘅阿姐驅趕！
屯門雖係半職業，但經過大半季甲組闖蕩，球隊已有變化，首先佢哋班塞爾維亞、黑山外援並非一般「托布」球員，能真正幫到球隊提升實力，而一班業餘球員放棄正職參加甲組賽事，首季就取得好成績，加上會方出力號召球迷營造主場氣氛，屯門步向職業球會已算有個好開始。
波總改革報告建議一年半後將本地波升格為「港超聯」，老老實實，港會同屯門都夠條件合資格，波總發牌委員會到時係咪應該諗諗呢兩隊呢？