「甜瓜」安東尼尋日打出加盟紐約人後代表作，16次起手入12球轟入34分，協助紐約人主場以131比109大炒爵士，常規賽兩連勝，繼續穩守東岸第6位。同日山貓以87比92不敵快艇，間接令塞爾特人成為今季首支球隊鎖定季後賽席位。
安東尼尋日面對爵士如有神助，一開賽已經着晒火，首節攻入13分，協助紐約人在首節過後領先16分。主隊第三節再度擴大優勢，在餘下一節時拋開28分之多，結果賽事早早進入垃圾時間，紐約人最終輕勝131比109，連續兩場贏波。
雖然「甜瓜」今場只係短短上陣30分鐘，但已攻入34分，其中三分球5射4中，手風順到不得了，而今場亦係安東尼加盟紐約人以來得分最高嘅一戰。至於拍檔史杜迪米亞今場亦有上佳演出，15次起手入12球貢獻31分。不過「甜瓜」同「A米」賽後均表示，並唔希望球隊只靠個人能力得分，長遠計始終要打出團隊風格。
另方面，暫列東岸第9位嘅山貓，同日以87比92不敵快艇，就算餘下賽事贏晒都肯定無法超越東岸一哥塞爾特人現時嘅成績，所以後者已成為今季首支球隊鎖定季後賽席位。這亦意味剛以自由身加盟塞軍嘅大前鋒梅菲，征戰NBA第十季，終初嘗季後賽滋味。