碧咸嫂恥與佐敦同機?

【本報綜合報道】碧咸由英國返番洛杉磯向銀河報到,準備新一季美職後,佢老婆維多利亞亦做「跟得夫人」,日前飛返洛杉磯會夫,結果又惹是非,據報佢本來係同元祖級WAG、「巨胸女模」佐敦搭同一班機嘅,但因為唔想同佐敦有任何接觸,所以改搭另一班機,維多利亞發言人就澄清一切只係巧合喎。而喺美國時裝界發展不俗嘅維多利亞,會登上人氣美容雜誌《allure》二十周年特集嘅封面,總算令佢心情大靚。

「萬人迷」碧咸歸隊後,就話自己年紀唔細,冇時間再去度假,表明會集中精神備戰新賽季,決心幫球會爭取佳績,連威廉王子婚禮都可能缺席。

萬人迷向銀河賣口乖

碧咸離開跟操多時嘅熱刺後,並冇去度假歎世界,而係即刻返洛杉磯銀河投入操練,佢向傳媒話:「自從一月起,我一直進行高水平訓練,去到我呢個年紀,已經唔可以放三個月假喇,所以我把握機會去熱刺跟操,總好過喺沙灘曬太陽啦,而經過持續操練後,我狀態肯定弗過上季。」