塞爾特人實力暴升

謝夫格連返「哎吔娘家」

「綠軍」塞爾特人在交易截止日前，送走不願續約嘅中鋒柏堅斯及「入樽王」尼特羅賓遜到雷霆，換來對方兩名正選謝夫格連及卡斯迪。司職前鋒嘅謝夫格連今次可算係回歸「母會」，皆因佢在07年選秀時被塞爾特人以第5號籤選中，但隨即被「綠軍」交易至超音速（雷霆前身）。謝夫格連近年已成為雷霆主力，今季平均出場37分鐘，貢獻15.2分及5.6個籃板，屬雷霆第三號得分點。至於中鋒卡斯迪亦屬雷霆正選，今季平均交出7.6分及4.4個籃板。

騰出薪酬空間迎梅菲

塞爾特人獲得兩將後，就將土耳其中鋒艾登及新秀夏蘭高迪送去騎士，換來一個次輪選秀權，另外亦將馬基斯丹尼奧斯送到帝王。據悉「綠軍」之所以送走幾名後備，全因勇士已決定買斷梅菲份合約，而呢位即將成為自由身嘅大前鋒，已表明會過檔塞爾特人，所以「綠軍」就要騰出空間收容。塞爾特人獲得謝夫格連及卡斯迪後，若然再得到梅菲加盟，爭標本錢無疑急劇大增。

不少球評家都認為，塞爾特人與雷霆今次交易屬雙贏，「綠軍」實力固然大幅提升，雷霆亦一直希望獲得一名具分量嘅內線球員，現時柏堅斯可與伊巴卡組成「雙塔」，加上球隊之後從山貓換入中蜂穆罕默德，內線實力更完整。

NBA今月重要轉會

東岸

球隊 獲得球員

紐約人 安東尼

籃網 迪倫威廉士

鷹隊 軒域治

塞爾特人 謝夫格連、卡斯迪

巫師 碧比

山貓 比沙比拉、彼德遜

騎士 巴朗戴維斯

西岸

球隊 獲得球員

雷霆 柏堅斯、尼特羅賓遜、穆罕默德

火箭 泰亞拔、達基斯

灰熊 柏堤亞

鳳凰城 布魯克斯

拓荒者 謝勒華萊士

快艇 莫威廉士、莫恩

黃蜂 蘭特利

爵士 夏里士、菲法斯

金塊 莫斯哥夫、費頓、加連拿利、韋遜贊特拿