港甲五福星陪你賀年 接財神喇喂！

卡爾派利是攞意頭

巴西前鋒卡爾上季初來香港，已經攞過聯賽神射手，舊年第一次喺香港過農曆新年仲逗緊利是，眨吓眼就第二年，今個新年佢已經唔同咗身份，今年要派利是喇！因為佢去年十一月已經同女友組織小家庭，今年仲由佢兩公婆一齊扮財神，郎才女貌，認真好意頭。

卡爾話，巴西係佢祖家，香港已經成為佢第二個家，自己亦徹底融入社區生活，最鍾意同隊友打邊爐，佢知道新年有好多傳統美食，樣樣佢都鍾意，趁球隊賽期空檔把握機會擦餐勁。

新年願望幫晨曦捧盃

講到願望，卡爾話自從加盟晨曦，雖然自己已經射入好多波，但咁都未夠，因為來港差唔多兩季，仲未幫球隊贏得任何錦標，始終係爭啲，所以今年最大心願就係幫球隊捧盃。

成家立室後，卡爾話今年當然會派吓利是，旨在攞意頭，希望大家發個新年財，賺多啲，而佢仲會同老婆努力造人，相信唔使好耐就會有BB出世，而佢目標竟然係生夠十一個，組成一支足球隊喎！卡嫂！辛苦晒！

迪天奴合家歡勁爆笑

今年係迪天奴在港第五個農曆新年，已經熟晒禮數，所以今年相約「野人」拍攝賀年相時，決定玩激啲，搵埋「野人嫂」同「小野人」一齊扮財神，見到佢哋一家人，係咪好有過年氣氛先？

迪天奴來港頭兩年都要比賽，先喺表演賽對橫濱水手，亦幫港聯重奪失落十幾年嘅賀歲盃冠軍，至於今個新年之前，佢亦幫公民贏得銀牌錦標，講到新年願望，「野人」指手畫腳猛講巴西話，意思大概係「繼續踢好波」咁上下啦。

扮財神竟似包公

至於今次扮財神就超搞笑，迪天奴膚色黝黑，一着起套「官服」同戴頂大帽，成個「包青天」咁款。

而佢兩個親人，「野人嫂」着起小鳳仙裝，「小野人」拎起兩碌大炮仗，真係睇見都開心！

盧比度祝大家地上最強

傑志西甲名將盧比度叔叔來港半季，今年係佢在港第一個農曆新年，大家咪以為佢會派利是，查實盧比度仍然係單身寡佬，佢仲準備好今年狂逗利是添！

盧比度話，一直知道中國人嘅農曆新年係大節日，不過以前喺西班牙，中國新年同自己冇乜關係，如今身在香港，終於有機會感受一吓過年氣氛。佢知道中國人過新年最鍾意講好意頭說話，仲知道通常係四個大字添，所以佢就拉起揮春祝球迷們「萬事勝意」，仲代表西班牙同巴塞隆拿，祝大家「地上最強」！

文嘉舞獅玩餐飽

來自非洲剛果嘅文嘉喺香港已經踢咗四年，呢位前鋒其實係一名浪子，職業生涯四處飄泊，唯獨農曆新年帶畀佢一種溫暖感覺，今次同隊友基藍馬舞獅賀歲，玩得零舍投入。

其實文嘉有個六歲大嘅女，但係文嘉仲未結婚。文嘉話剛果習俗，生仔係唔需要成家立室嘅，所以佢一直過住單身生活。自從嚟到香港，特別係過新年嘅日子，見到香港人家家戶戶着到紅噹噹歡天喜地，佢亦受到呢種溫暖氣氛感染，好鍾意農曆新年呢個節日。

基藍馬金句當送禮

港甲眾多喀麥隆外援當中，近年最當紅相信就係呢位「正義外援」基藍馬，去年基藍馬因拒絕受賄打假波，更挺身舉報而成為名人，受社會人士激讚，呢位正義嘅朋友，藉住新春喜慶機會，又有偉論發表！

基藍馬表示，知道中國人過新年鍾意賭兩手，發個新年財，而佢亦語重心長奉勸港人：小注怡情！基藍馬坦言自己不愛賭錢，因為自己多年來跑慣碼頭，一早就明白乜嘢係十賭九騙，祝大家細細注玩吓就好，最緊要新一年發正財。

圖／文：黃兆崑、司徒子文、Carrie