拓荒者強勢追殺木狼
【本報綜合報道】今日係馬丁路德金日，亦係美國嘅公眾假期，所以好多賽事提早打日波，即係香港時間周二凌晨就開波，直播波係拓荒者對木狼。拓荒者長期受傷患困擾，先有奧登今季提早報銷，另一主將萊爾亦要長抖，但艾迪列治近期保持水準，昨日全靠佢擊敗籃網，明早對木狼都要繼續靠佢食胡。（now 678及有線165台周二早上11時直播）
拓荒者近期表現唔太穩定，目前僅排西岸第8，如果要打入季後賽嘅話必須再加把勁，而佢哋最大嘅對手就係依家排第9嘅灰熊，所以今仗對住西岸魚腩部隊木狼，拓荒者不容有失。
艾迪列治徒手破「網」
拓荒者近期嘅得分重心都係集中喺大前鋒艾迪列治，昨日對籃網佢獨取27分，冇畀對方嘅中鋒布克盧比斯搶晒鏡，但拓荒者外線得分能力稍遜，故打法較為單調，而且木狼內線亦有近期人氣急升嘅路夫壓陣，艾迪列治想硬爆得分並唔容易。
唯一較令拓荒者放心係雙方最近10次交手佢哋都能夠贏波，心理上贏晒，加上木狼昨日又輸畀魔術，氣勢好弱，今仗睇高拓荒者一線好合理。