大帝豪言：熱火係Heatles
「大帝」勒邦占士豪言，目前嘅熱火可稱為Heatles（熱頭四），因為熱火跟當年紅極一時嘅Beatles（披頭四）樂隊很相似 。「大帝」尋日作客出戰山貓前接受訪問話：「我覺得熱火現在就係Heatles！」佢將熱火當作披頭四，主要係佢覺得熱火到邊度打波，邊度就會爆棚，同當年披頭四去邊度演唱，邊度就會爆棚一樣！
兩巨頭各取30+劏貓
又好難怪「大帝」咁鬼意氣風發，尋日對山貓賽前，NBA就公布佢同及韋迪「兩巨頭」共同獲得十二月東岸最佳球員殊榮，而兩人亦隨即大顯身手，齊齊在山貓身上取得「30+」，係兩人喺熱火合作後首次做出此數據，最終熱火亦以96比82輕取山貓，連勝延至6場。
眼神示威寸「波神」
「閃電俠」韋迪同「大帝」占士，今場各威半場，韋迪上半場攻入18分，為熱火在第二節反超前對手，全場就得31分及11個籃板。至於「大帝」就喺下半場發威，兩節內攻入26分，更在尾段一次大力入樽後，跑到山貓老闆「波神」米高佐敦面前透過眼神示威，占士共獲38分及9個籃板，最終助熱火大勝山貓14分。
本報綜合報道