十個靚女 美麗有序 《青萌上河圖》熱爆全城

早前《3D動畫版--清明上河圖》熱爆2010年,而到2011年亦出現了一幅《青萌上河圖》,以預視今年一眾「青春×萌(可愛之潮語)」女子運動員上位指數!更犀利嘅係,呢份寶鑑將國際版及本地體壇版兩個Version二合一;十位美少女當中,邊個會係你心目中嘅「萌主」呢?

許煒森鐵血健兒雙線發展

今年對「小鐵人」許煒森(Vincci)嚟講係重要嘅一年,因為讀緊中七嘅佢為咗考入港大社會科學系,已經放晒成副心機落去讀書!不過即使幾忙都好,Vincci都會Keep住訓練,以免考完A-Level「復出」時身形走晒樣就唔好啦!佢表示:「中五嗰年我為咗考試而『零運動』,搞到最後發福咗唔少,好辛苦先操番起!」許煒森希望入讀大學之後,可以專心向運動與學業兼顧發展,目標當然係大學畢業,同埋爭取二○一四年南韓仁川亞運入場券。

「精靈鐵人」許煒森

年齡:18歲

項目:三項鐵人

威水史:2010年青年奧運會香港代表

孫延在清麗脫俗最啱

南韓靚女多,不過要靚到好似藝術體操16歲小美人孫延在咁清麗脫俗,就真係世間難尋,亞運勇摘銅牌,更肯定咗孫延在嘅實力,並非只係「花瓶」。事實上,孫延在係一個外表柔弱,但內裏堅強嘅女孩,平日訓練刻苦不在話下,但係佢從不埋怨,仲話要有磨練嘅心先可以真正感受成功嘅滿足,單係呢份毅力已經贏晒唔少「公主病」女孩!

「純真美少女」孫延在

年齡:16歲

項目:藝術體操

威水史:2010年亞運個人賽銅牌、南韓全國冠軍

禾絲妮雅琪率直網民心

好多靚女畀人一種「高不可攀」感覺,但來自丹麥嘅琪妹就唔同,親和力過人係佢成功上位嘅秘訣之一。雖然2010年球季佢大爆發,世界排名急升穩坐第一把交椅,但率直嘅佢依然去到邊都笑面迎人,閒時鍾意踩吓單車,非常健康。應屆中國公開賽冠軍嘅琪妹更坦言喜愛中國文化,最愛中國菜式。在此祝福琪妹今年達成大滿貫心願,做個真正一姐。

「丹麥甜心」禾絲妮雅琪

年齡:20歲

項目:網球

威水史:現役世界排名第一、2010年6奪WTA錦標

何姿跳入人氣偶像派

中國歷代跳水王后閃爍舞台,先有伏明霞及郭晶晶名成利就又找到好歸宿,下一位最有機會戴上天后桂冠嘅將會係「90後」跳水公主何姿。

廣西姑娘何姿喺2010年破繭而出,於亞運會女子三米板決賽被領隊周繼紅委派爭金重任,實力超班嘅佢最終以382分摘得金牌。事實上,只有20歲嘅何姿多次擊敗師姐吳敏霞,喺郭晶晶停賽一年甚至未知會否出席倫敦奧運嘅情況下,何姿更躍升「夢之隊」人氣偶像。

場外嘅何姿愛扮靚,化「行」妝為雜誌拍沙龍,懂得自我宣傳,新一年佢話要減Baby fat,希望以更弗狀態衝擊世界盃等大賽錦標。

「姿整跳水公主」何姿

年齡:20歲

項目:跳水

威水史:2010年廣州亞運3米板金牌

黑嘉嘉典雅棋女子

黑嘉嘉得天獨厚,五歲時攞住母親送嘅一副圍棋而自學成材,2010年完成亞運心願,成為最年輕嘅中華台北代表。而場外的「Lady嘉嘉」亦十分「不一般」,與其他少女喜愛行街買東西不同,嘉嘉不愛貴價嘅時裝,最愛穿旗袍,興趣是看金庸小說、彈琵琶、鋼琴,而且更是學校游泳隊嘅主力,可謂非常健康。

「Lady嘉嘉」黑嘉嘉

年齡:16歲

項目:圍棋

威水史:2010亞運女子團體銅牌

淺田真央冰后再起舞

2010年係淺田真央重要嘅一年,除咗贏得首面冬奧花樣滑冰銀牌外,更喺世界錦標賽力壓「南韓精靈」金妍兒而登上世界之巔,令佢喺日本嘅人氣再度飆升,更獲選為國民「最想女兒或孫女成為怎樣的女性」第七位超級偶像,就連傳統日本玩偶公司都打佢主意,製造咗高半米嘅站立式玩偶公開展覽,令20歲嘅淺田紅透東瀛,進一步鞏固其廣告女王地位。淺田已為2011年編定兩套新嘅自由滑同短節目動作,並重金禮聘前冬奧冠軍荒川靜香嘅教練長久保,專責擔任自己嘅跳躍教練,可見小妮子對爭取在三月份世界錦標賽衞冕雄心勃勃呢!

「童顏冰后」淺田真央

年齡:20歲

項目:花樣滑冰

威水史:2010年世界錦標賽冠軍、2010冬奧銀牌

何雁詩高歌發放正能量

憑藉參加《超級巨聲》而踩入樂壇嘅何雁詩(Stephanie),上年除代表香港出戰亞運高爾夫球賽之外,更喺年尾為電視劇《居家兵團》唱主題曲,對於呢位啱啱滿十八歲嘅靚女嚟講,2010年絕對係難忘一年!不過,Stephanie就話據睇相佬所講,佢喺今年行正大運,絕對幫到自己三線發展:「2011年會放多些時間落讀書及唱歌度,希望可以唱多啲『開心歌』,畀啲正能量大家!雖然打波嘅時間會少咗,但都想繼續Keep到比賽同練習;為咗兩者兼得我決定留喺香港而放棄去外國讀書念頭,所以嚟緊嘅大學入學試好緊要,如果考入中大就Perfect!」

「高球巨聲」何雁詩

年齡:18歲

項目:高爾夫球

威水史:2010年廣州亞運香港代表

賴倩敏騎出新天地

身為前港姐吳夏萍之女,賴倩敏(Jasmine)當然遺傳咗媽咪嘅美貌同智慧!佢喺上年青年奧運會團體賽中,創出「零罰分」完美成績,贏到一面銀牌,真係好叻女!嚟緊2011年Jasmine將會大幅「升呢」,因為已經升讀美國Skidmore College展開大學生涯嘅佢,喺呢間以騎術聞名於世嘅學校入面讀書,想唔勁都唔得啦!依家賴倩敏已經鎖定參戰2012年倫敦奧運嘅目標,佢最想當然係同家姐、另一港隊代表賴楨敏攜手參賽就最好!

「完美女騎士」賴倩敏

年齡:18歲

項目:馬術

威水史:2010年青年奧運會跨欄賽(隊伍)銀牌

Lulu足壇女神威過陳七

上年本地足球壇真係好熱鬧,其中和富大埔更加搵咗個「Fit Baby」Lulu(董嘉儀)幫手打氣;而根據非正式統計,Lulu嘅見報率比起「陳七」陳肇麒更高,成為球壇一大話題!就以Lulu個facebook「朋友」數量為例,喺佢短短「出道」四個月就激增至接近四千人,增長速度差唔多有十倍,好多「宅男」仲當佢係「女神」咁拜,人氣之勁真係巴閉!講番今年目標,Lulu好希望大埔隊可以喺足總盃或者聯賽盃攞番個冠軍,咁樣佢打氣時候都會特別醒神,球迷搵佢影相都靚好多啦!

「大埔女神」Lulu

年齡:17歲

項目:足球

威水史:被委任為大埔足球隊大使

鄭曉為劍指亞青賽

上年香港隊喺廣州亞運大豐收,而喺成班「亞運英雄」當中,年紀最輕、僅得十五歲嘅「花樣劍手」鄭曉為(Valerie)可以話係前途無限!雖然呢位花劍團體賽銅牌得主「劍齡」只得六年,卻已升格為香港代表,難怪佢對今年三月遠赴泰國出戰亞青賽顯得信心十足:「上屆我喺亞青賽少年組奪得團體亞軍,嚟到今年當然想更上一層樓攞金牌。其實我喺亞運時已賺取唔少經驗,有助『升呢』應付呢個少年組比賽!」

「有為劍手」鄭曉為

年齡:15歲

項目:劍擊

威水史:2010年廣州亞運花劍團體銅牌