第十輪西甲最後一場賽事，西維爾藉長時間踢多一人嘅優勢下，憑兩位後備兵尼格度及艾真度艾法路各建一功，以兩球淨勝華倫西亞，搶得三分後升上聯賽第六位。
華倫今場都可謂輸自己，中場美密特托普僅開賽二十五分鐘即因粗野攔截主隊後衞馬田卡沙利斯，直接領紅離場。華倫咁早打少一人，形勢急轉直下，被西維爾圍住嚟攻，結果去到下半場五十四分鐘後備入替嘅尼格度門前執雞，為西維爾打破僵局，其後另一後備兵艾真度艾法路在尾段時間再下一城，最終西維爾以兩球輕勝，保持主場不敗。
西維爾贏波後追貼華倫，兩軍現時同得十七分，西維爾憑較差得失球排第六。經過第十輪聯賽後，皇馬現時以八勝二和得廿六分的不敗佳績領導群雄，巴塞則少一分緊隨其後。