「夢九」險勝巴西兩分 杜蘭特獨食遭圍插

巴西痛失最後一擊

美國與巴西賽前同樣兩戰兩勝，而後者更被譽為「夢九」在Ｂ組嘅最大勁敵，所以「夢九」今場明顯打得特別認真。

不過呢支缺乏星味嘅夢幻隊，首節已遭逢挫折，完節前突然被巴西打出一段８比０攻勢，落後６分，亦係「夢九」在今屆賽事中首度在第一節落後。

美國及後加強防守，令巴西在第二及第三節嘅命中率均有所下降；經過三節過後，美國反超前兩分。而勝負關鍵就在完場前三秒，當時巴西侯亞達斯博得罰球，殊不知兩罰全炒，錯過追平打加時嘅良機，最終美國得以險勝70比68。

杜蘭特今場繼續成為賽事主角，攻入全場最高27分並得10個籃板球，但佢同時亦出現７次失誤。有美國傳媒指摘杜蘭特過分獨食，一攞波只顧自己得分，但卻不時犯下低級失誤，至於比立斯及戴歷羅斯則分別攻入15及11分。美國贏波後三戰全勝，餘下分組賽將會面對Ｂ組實力最弱嘅伊朗及突尼西亞。

第5天賽程

周三晚9:00

C組 中國 Vs 俄羅斯*

周三晚9:30

A組 塞爾維亞 Vs 澳洲

周三晚11:30

C組 科特迪瓦 Vs 希臘

D組 黎巴嫩 Vs 西班牙

註:以上為香港時間

*為有線62台直播