程萬琦二千萬組軍玩ＣＢＡ
香港有望成為CBA（中國籃球聯賽）城市！亞洲職業籃球總會會長程萬琦昨喺亞洲職業籃球挑戰賽記者會上爆料，話正籌辦一支香港球隊進軍CBA，並實牙實齒咁話：「我搞一定批！」程萬琦仲話會喺九月尾開打嘅「匹克亞洲職業籃球挑戰賽」，喺香港隊入面揀蟀，球員月薪可高達五至十萬元！
泳兒任亞職賽大使
程萬琦話：「我正計劃喺香港搞一支球隊去打CBA，由於依家CBA得十九隊，所以佢哋都好歡迎我嘅計劃，我估最快可以喺下年就搞得掂。講起難處，一定係場地問題，要喺香港搵個有三千座位嘅主場真係好難，我建議將西區公園或荔枝角公園體育館改建，其次就係資金，我預計班費大約二千萬港元，但其實已有好多人話有興趣支持，包括今次亞職賽贊助商之一嘅楊受成。」
講番今次亞職賽，由於中國、馬來西亞同泰國都派出職業球隊，所以香港隊會加入兩位外援，組成香港聯賽明星隊。
比賽由九月廿四至廿八日喺灣仔修頓室內場舉行，賽會更邀得歌手泳兒擔任球賽大使，而鍾舒漫、詩雅及吳浩康都會到場為香港隊打氣！
