南華昨在加山球場進行一年一度季前拜神儀式，主席許晉奎率領南華足球隊參神祈福，適逢今年係南華體育會一百周年慶典，許氏勉勵球員繼續踢好波，捧多幾隻盃，今季班費約一千萬嘅南華有兩大目標，就係衞冕聯賽同埋問鼎亞協盃！
「少林寺」今季陣容有個別變動，新加盟華將有葉鴻輝、趙俊傑及徐德帥，陳偉豪改投流浪，巢鵬飛轉會晨曦，利偉倫、卓卓及何國泉過檔飛馬，外援沙域臣及里奧離隊，但已重召前鋒卡里祖，以及簽入巴西新中堅艾維斯。
南華人腳喺本地波一定夠踢，但如果想贏亞協盃，就要從訓練着手，因此今季球隊大幅擴充教練團人手，金判坤任總領隊，教練團成員包括顧錦輝、安尼頓、廖俊輝、陳志康，以及新加盟成員陳浩然、基保及范俊業，人數多達八人。
為備戰亞協盃，南華今季將會充分利用本地波空檔，為球隊安排熱身賽，例如十一月亞運期間，將飛赴西亞巴林、科威特各國比賽，又計劃向足總申請接辦明年初「賀歲盃」，足主羅傑承表示：「已發信邀請中、日、韓各一隊，進行一場高獎金錦標賽。」此舉既可維持賀歲盃傳統，亦為南華會百周年慶典節目之一，最重要係南華可藉今次賽事備戰亞協盃，可謂一舉三得。
除咗踢好波，南華今季就「紅黃牌及停賽」問題有嚴格規定，羅傑承指出：「亞協盃球證嘅執法尺度，我哋已經領教過，上兩屆亞協盃，南華便因主力停賽缺陣最終被淘汰，為免今屆再犯，球員若在不必要情況下領紅黃牌，必定重罰！」早前南華拉隊到南韓集訓，便曾參照電影《少林足球》橋段，故意叫球證偏幫對方，己方球員縱使被侵犯亦要啞忍，鍛煉脾氣。