上季年薪高達2,300萬美元嘅「T-Mac」麥基迪，似乎已找到新東家。據ESPN消息，麥基迪願意放棄「打正選」加盟公牛，並將在今周與後者簽約，但薪酬就會大幅下降。
兩屆NBA得分王麥基迪上季被火箭送到紐約人，24場常規賽均以正選身份上陣，平均上陣時間為26.1分鐘，獲得9.4分及3.9次助攻，但及後卻再受傷患困擾。「T-Mac」今夏成為自由身後，盛傳想轉投熱火，欲借助「新三巨頭」掹車邊去攞番隻冠軍指環，可惜神女有心，襄王無夢，惟有投靠公牛。
據悉三十一歲嘅「T-Mac」已表明願當公牛替補，去促成交易，但因「T-Mac」過往實在太易受傷，所以有傳佢會先到公牛跟操，若然證實冇事就會在今周簽約。公牛靈魂戴歷羅斯得悉後表示期待與麥基迪做隊友，因為後者係佢兒時偶像，絕對撐佢加盟公牛。
另方面，美國隊日前經過分隊對決後，ESPN專家估計K教練克爾澤維斯基會在泰拉基伊雲斯、艾歷哥頓、格蘭加、美奧、麥基及謝勒華萊士六名球員中，裁走四人，然後在當地時間下周一決定大軍名單。