鳳凰城癲咗狂炒木狼

素來以得分力強見稱嘅鳳凰城太陽,尋日異常瘋狂,每節均至少獲得35分之多,以152比114痛宰木狼,寫下今季NBA得分新高!教練根特利賽後表示,餘下一個月嘅常規賽都會加強火力,操到最弗迎戰季後賽。

鳳凰城今場可謂上演忘我得分騷,98次起手入55球,投射命中率達56.1%;三分球31投15中,命中率48.4%;罰球29射27中,命中率達93.1%。四節得分為38、41、35及38分,而全隊合共有八人得分達雙位數,所有數據都非常瘋狂,而最值得驚訝係今場賽事未有通過任何加時,得分仍創新高。鳳凰城教練根特利賽後表示:「我哋決定在餘下15場常規賽中加強火力,操弗狀態,呢個就係我哋最擅長嘅快速打法!」

史上最高173分

雖然鳳凰城今場攻入驚人152分,但原來NBA自86至87球季開始有完整紀錄後,呢個得分只能排於NBA史上單場第廿七高。不過不包括加時嘅話,最高得分依然係鳳凰城所保持,90年於主場以173比143擊敗金塊,成為史上最高。有趣係頭五高嘅得分賽事,竟都與金塊有關,不過戰績係一勝四負,可見近年崛起嘅金塊,原來過往常被大炒。

本報綜合報道