小牛破網13連勝
小牛大勇十三連勝！雖然小牛尋日有主將魯域斯基失準，投射命中率不足兩成，但其餘隊友表現平穩，並分擔了其得分責任，加上對手籃網實力較弱，結果小牛贏96比87，延續今季最長連勝至十三場。
魯域斯基尋日都算罕見地嚴重失準，全場16射僅得3中，投射命中率連兩成都冇，最終僅為小牛貢獻12分。不過，魯域斯基依然累積到20,714分，成功躋入NBA史上總得分排名榜前三十位，達到職業生涯中一個里程碑。今場表現最Sharp要數老將傑特，佢上陣44分鐘，攻入20分及9次助攻，包括5個三分球，係小牛下半場反勝嘅最大功臣。此外卡朗畢拿、馬利安、希活及比奧寶斯均攻入雙位數字得分。
姚明恢復投籃訓練
另方面，有消息稱正在養傷嘅火箭主力姚明，會在下季季前賽復出。火箭首場季前賽會喺10月6日在墨西哥對魔術，大有可能就係姚明復出之日。姚明現已脫去保護靴，開始進行投籃訓練。 本報綜合報道