本文重點
每個人都想飛，香港足球小天才陳俊樂遠赴英國，加盟英冠球隊彼德堡U14青年軍已七個星期，年僅十三歲、身高得一米五嘅樂仔面對一班英國「大隻仔」，表現完全冇輸蝕，唔只搶到必然正選位置，更加喺校隊近四場連續有波入，無論領隊、教練、老師全部豎起手指公大讚，正如○四年劉翔奪得奧運百一米欄金牌所講 ，誰說中國人不可能？樂仔似乎都想話畀大家知，踢英超，香港人都有可能！
雷丁青年軍邀試腳
出發前樂仔喺男拔萃讀中一，到達英國後被評估學業成績達中四水平，因而被安排跳級讀會考課程。思想、言談超成熟嘅樂仔，自言最鍾意阿仙奴隊長法比加斯，佢登陸英國後，有如法比仔上身，為校隊上陣十三次攻入八球，近期試過連續四場入波，極速打響名堂，更加被雷丁青年軍邀請試腳，登陸英超絕對唔係得個諗字。「我當然希望做到第一個加盟英超球會嘅學生啦！之前同雷丁踢完友誼賽，我被邀請去試腳，可惜第二次比賽因為落雪取消。但我會堅持踢英超嘅目標，絕對唔會放棄，我最希望加盟阿仙奴。」
Brooke House領隊、教練、老師都對樂仔讚不絕口，認為他前途無限。其實樂仔的獎學金，來自專為十四至十六歲年輕球員而設嘅「夢想成真」計劃，香港選拔由小米蘭主辦，第二季報名由三月八日開始至三月三十一日，詳情可到www.littlemilan.com.hk查詢。