依家去飲做「人情」通常都係公價五百，但今次南華籃球隊擺「百歲大壽」所收嘅賀禮就一啲都唔嘢小！佢哋一班球星譚偉洋、羅意庭同劉子健等，已決定準備一份「含金量」比千足金更重嘅「雙料金牌」做賀禮，誓要先喺今日開打嘅銀牌賽衞冕錦標，再喺甲一聯賽重奪失落一屆冠軍，用呢這兩塊金牌嚟幫南華「擺大壽」贈興！
高級組銀牌賽今晚開波，衞冕嘅南華要同愉園爭入四強，呢支力爭「三連霸」嘅勁旅今屆搵咗周健宏、陳翊麟同李翹峰加盟，實力大為增強。
重點栽培周健宏
班主洪游奕話加強軍容都係想贏個冠軍賀南華體育會成立一百周年：「我哋今年加咗三個年輕球員，希望隊波可以更有活力，速度可以再快啲。而十九歲就已經打港隊嘅周健宏更加係球隊重點栽培球員，除咗畀機會佢上陣外，仲會送佢去台灣跟勁旅『台啤』跟操！另外，大家可能唔知，其實李翹峰係南華出身，七年前球隊升班甲一時佢都有幫手，所以今年同佢商量咗好耐，希望可以喺南華一百周年返嚟打波。」李翹峰上屆幫永倫喺聯賽擊敗南華奪標，今次轉會就好似足球界入面由巴塞轉會皇馬一樣咁震撼。
南華今年加添咗呢三員猛將，再配合原有嘅譚偉洋、羅意庭、劉子健、胡國鋒同李劍煌等一眾奪標功臣，實力絕對能夠與上屆甲一季後賽盟主永倫爭長短。
添三虎衝擊永倫
隊長譚偉洋更認為球隊有優勢：「球隊喺季前送咗羅意庭同周健宏等年輕球員去台灣跟操，實力『升呢』之餘更成長咗好多；再加上我哋喺二月初舉行嘅工商盃決賽曾經擊敗過永倫，信心方面亦提升咗唔少。」