本文重點
【本報綜合報道】達拉斯小牛尋日喺主場挑戰上季總冠軍洛杉磯湖人，結果球隊成功凍結高比拜仁下以101比96贏波！高比仔今場雖刷新多項紀錄，可惜「里程碑之夜」卻要在輸波中度過。
小牛5連勝
小牛賽前挾四連勝迎湖人。卡朗畢拿雖因傷缺陣，但代佢位置嘅史堤芬遜專注防守表現不俗，上半場成功凍結高比仔；而下半場改以馬利安嚴防高比仔，結果令佢全場23射僅9中得20分，投射命中率不到四成，最終小牛贏波延續五連勝。
今場雖然輸波，但高比仔造出多項紀錄，累積得分達到25,298分，超越米拿躋身史上得分榜第十三位；而累積搶截亦達到1,531次超越穆連；為湖人上陣時間亦達到36,579分鐘，亦在球隊史上超越了名宿謝利韋斯。