本文重點
ＮＢＡ轉會限期將於明日截止，好多球隊正密鑼緊鼓，希望藉交易球員增強實力，目前傳得最勁嘅交易首推史杜迪米亞莫屬，盛傳騎士同熱火都希望搶到呢位猛人加盟，但率先彈出嘅交易，係快艇中鋒甘比加盟拓荒者。據報甘比對被交易到拓荒者感到相當不滿，因為佢屋企人好鍾意洛杉磯，而且球會喺交易前亦冇同佢傾過，令佢感到不受尊重。快艇則換來前鋒歐羅及控衞布力克。
明星賽曲終人散後，又到各隊搏殺時候，今明兩日都有多場賽事舉行，缺席明星賽嘅兩大巨星高比拜仁同「ＡＩ」艾佛遜都已傷愈復操，高比仔更鐵定於今日對勇士一戰上陣。
高比仔拍檔加素亦有好消息，佢剛獲得國際籃聯選為歐洲年度最佳球員，加素去年除協助湖人奪得ＮＢＡ總冠軍，更帶領西班牙奪得歐洲錦標賽金牌，故連續兩年奪得此殊榮可謂實至名歸，第二名則係小牛嘅德國球星魯域斯基。
小牛「大改造」迎戰太陽
至於明日重頭戲小牛主場對太陽，大家有機會睇吓「新小牛」表現。小牛剛與巫師達成七人交易，得到卡朗畢拿、希活及史堤芬遜加盟，行政總裁尼爾遜表示增兵行動未結束。