今年NBA明星賽撞正喺美國時間情人節舉行，當地球迷自然一雙一對入場睇波，過一個不平凡嘅情人節，氣氛倍感溫馨！至於參賽球員同樣獲得另一半支持，就如「風塵三俠」勒邦占士、韋迪及安東尼，雖然三人向來「沙沙滾」，又唔肯同女友結婚，但情人節都識做「正印」行先，都算畀足面啦！
安東尼女友唔逼婚
今年情人節，相信安東尼會過得好安樂，皆因女友拉娜終於都打消咗結婚念頭。眾所周知安東尼係一隻冇腳雀仔，所以就算同拉娜訂婚五年之久，依然唔肯同人拉埋天窗。正所謂「If you love someone,set him free.」拉娜近期已經除低咗隻訂婚戒指，擺明唔想用婚姻綁住愛郎。
大帝去邊都帶阿嫂
占士腰纏萬貫，自然多女埋身，不過「大帝」向來重感情，就算發咗達都冇話放棄青梅竹馬嘅女友Savannah，情人節梗係拖住佢一齊出席明星賽。其實占士每逢出席大大小小活動，都會拖埋Savannah出席，就好似上季MVP頒獎禮，或者早排去佢老友Jay-Z嘅演唱會，奠定正印地位！但就係點都唔肯同人結婚囉。
韋迪姊弟戀浮上面
自從韋迪同前妻離婚，得閒就「開吓P、識吓女」，成個情聖咁都不知幾盞！不過睇嘢唔可以睇表面嘅，其實韋迪一直都同緊卅七歲藝人Gabrielle Union搞地下情，更有傳佢係當年嘅第三者，搞到韋迪婚姻破裂。但點都好啦，兩人喺剛過去嘅聖誕節先到沙灘浪漫，似乎韋迪已經搵到佢嘅Miss Right！