今年東西岸明星賽後備名單都算大有驚喜，皆因半數入選球員未曾征戰過明星賽，主場嘅西岸「新兵」有雷霆前鋒杜蘭特、爵士後衞迪倫威廉士及灰熊前鋒蘭度夫，其中蘭度夫近季一直被冠以「毒瘤」之名，今次入選可算吐氣揚眉。

魯域斯基上陣新高輸波敗興

東岸新面孔更多，包括鷹隊前鋒荷福特、塞爾特人後衞朗度、公牛後衞戴歷羅斯及山貓前鋒謝勒華萊士。上季新秀狀元戴歷羅斯，係自「波神」米高佐敦退休後，首位公牛球員入選明星賽，而參加咗入樽賽嘅謝勒華萊士，則係山貓自○四年成立以嚟，首位球員打入明星賽。大批新人入選自然擠走唔少老將，一眾星級球員如傑特、奧尼爾及比立斯等均未有入選，今年明星賽都算改朝換代。

幸好小牛嘅魯域斯基今次亦榜上有名，將以主人家身份出戰明星賽，而佢尋日亦完成生涯另一里程碑，就係為小牛上陣達到884次，超越巴特戴維斯成為球隊史上上陣次數最多嘅球員，可惜小牛作客太陽表現欠佳最終輸106比112，而太陽亦因此終結兩連敗厄運。